إنتخبوني . وترى بفوز غصب عن اللي مايبوني !
أولاً أبارك لاخواننا بدولة المغرب الشقيق اللي عقب فترة بيصيرون مثلنا خليجيين ومع عيالهم " كوامري " ويركّبون بناتهم مع باصات " الصافنات " حقت نقل الجامعة اللي نصّ الكراسي فيها متشققن جلدها . أبارك لهم هالقطار اللي تقاطّو فيه دول الخليج عشان ينعمون بالرفاهيه . أهم شي المغرب واهل المغرب وعيال المغرب وحنا ناكل هوا وبحريقة ، وحدّنا القطار اللي بملاهي الحكير ويخب . وش سنعنا . لاوجيه ولا جوّ ولا حتسي ولا منّا أي فايدة . وحتى عيشتنا كلها يامرقوق يامطازيز وان كشخنا مرة حطو الحريم السعوديات " رز بكشنته " ، وينهم عن الكسكسي والبسيبسي والطاجين بالجبنة !
خامساً .. هالايام من اللي مايحتسي بالانتخابات ، فلان مرشّحن عمره وهو مايستاهل لاتصوّتون له . وفلان تراه كويس والشيخ الفلاني مزكّيه يقول إن صلاة الفجر ماتفوته . وفلان تراه لبرالي وخواته يفتشون بالمطار لاأحد يعطيه صوت حسبي الله عليه وعلى خواته . وجوالي كل شوي طايحه فيه رسالة " أنا صوتك المسموع فلا تفوت الفرصة " ورسالة ثانية " صوتكم أنا وأنا صوتكم " ، قسم بالله حتى التعبير مايعرفون له
وقبل كم يوم على الدايري واجهرني نور جاي من صوبي اليسار واثاريه واحد مستاجر قاعة عرس ومجمعن نصّ حقين حارتهم وحاط لهم مفطّح ويحاول فيهم يصوتون له . وواحد اعرفه شخصياً . كسره وماكمّل المتوسّط وماخلى رصيف إلا ورقاه ولا إشارة إلا وشق تسبدها وماخلى بنقالي في محطة بنزين إلا وتقاشر معه ولقيته مرشّحن عمره وتساذبن بالمؤهلات ويقول إن عنده دبلوم علوم ، إلا والله دبلوم سموم جعل السموم تشب في تسلاك .
الشعب تعلّم قبل كم سنة يوم انهم هبّو بصورهم بالشوارع . مكاييج ملطّخه وحتسي ووعود تشافيز وكلام ودّك بس تقراه من زينه ، يطيّرك للغما ويخليك تمشي على ورد طايفي . وذيك المرة رحت أنا وعيال خالتي وصوّتنا لواحد معشينا بوفية مفتوح في استراحة بحي نمار وحنا نتعشى قال لنا : ترى والله ثم والله لإن تشوفون الرياض غير وان تقولون وينك عنّا ذيك الايام ، بخلي طريق الملك فهد سيده بدال ماهو معكوف عشان تسهل الحركة واللي يطلع من بيته قبل الدوام بساعة ونصف ماعاد يشيل هم . بخليه يطلع من بيته قبل الدوام بربع ساعة ويفطر ويعبّي بنزين بعد وهم مابعد قفّلو بيان الحضور عنه بالدوام . بحلّ مشكلة معارض السيارات وبخلي اللي يبي يبيع سيارته ماعاد يشيل الهم . بس هو من يفكّر يبيعها بيلقى الزبون عند الباب يقول يالله إخلص عطني مفتاح السيارة أبي أطيح على المقعده . بحل مشكلة الصرف الصحي اللي مخيّسن حي المروج . ماعادكم شايفين مويه تقطّر بالشارع وبتقولون والله إنك تصلح ملك يابو فلان . بجيب مباريات كاس العالم عندكم بالرياض وبخلي بلتر ينقهر . بغيّر الجو مع دخول الصيف وبخلي البرد يشخفكم . بحل مشكلة البطالة وبخلي كل الشباب ماعاد يعرف للميه درب ويصير مايتعامل إلا بالزرقا لابغى يشري خبز بريال . بدمج البحرين بالدمام وبخلي العسكر يروحون لها من دون جواز . وخذ ياحتسي وخذ ياعلوم !
وحنا مبسوطين مابلا نقطّع من هالكبده والكرش واللحم ونقول بانفسنا ياولله إنه رجّالن سنع . يصلح يصير من الإسرة المالِكه ذا
ويوم جا عقب إسبوع ونستبشر . فلان تراه فاز ، وواحد يقرب لي مرسل لنا رسالة جماعية : أبشّركم أظهر الله الحق وفاز فلان وصار مُنتخب سعودي قصدي مُنتخب لنا وأي شي نبيه بيسويه لنا .
وحنا نحسب إننا خلاص ، مابغينا شي بيسنّعه لنا . مطبّ في تقاطع ، صبّات في ساحة يفحطون فيه دشير توالي الليل ، نبي والله يزفلت لنا الشارع ولا نبي مثلاً مواقف لمواترنا عن الشمس . وخذ ياأماني وخذ ياأُمنيات . وين ذاك الجو اللي تقول " بتبورده " ؟ . وين البحرين اللي بتصير حول حي الثقبة ؟ .. وين ووين !!
عاد هو مواعدنا لامنّه فاز بيعزمنا باستراحة الغروب ذيك اللي فيها مسبح حق رجاجيل ومسبح حق حريم وبيحط لنا ذبيحتين وبنجيب أهلنا عقب العِشا عشان يسبحون ( الله من الشعر اللي يسبح معهم ) ، ويوم جا عقب إسبوعين وادقّ عليه : هاه وين الاستراحة اللي تقول ؟ هماك مواعدنا .
قال والله إني بغيت آخذ استراحة بس ماقدرت عشان عندي إجتماع بلدي نبي نطوّر البلد ونفتح لكم شوارع جديدة وبنقعد نصالي فيكم الله ياخذكم كانكم اشغلتنونا . ماعاد وقفت جوالاتنا الله يقلعكم !
قلت يعني مافيه إستراحة ولا كيف ؟
قال إلا فيه استراحة بس مهوب آلحين .
طيب متى ؟
ياخي مهوب آلحين ماتسمع الكلام !
ومير إن صوته تغيّر ولسانه طال وخوينا مهوب خوينا . وين ذاك الحتسي الزين ! ، وين يوم إنك تقول " صوتي صوتكم " ويوم إني بالاستراحة معكم وتقطّع لي من اللحم يوم اني جنبك ومعطيني نص التفاحة اللي قاطعها عقب العشا لك !
وينك يوم إنك تبتسم لي وانا وياك قاعدين نغسّل عشان العشا وتقول لي " والله إن اخليك كلمتن يحتسي بها الناس عنك وان تشوف شي ماشفته بعينك "
وينك ووراه تغيّر حسّك يافلان !!
وكن الارض ماعاد قوت تشيلني وحسيت إني اكلّم منصور بن متعب بن عبدالعزيز ، مهوب أكلم " علي " اللي معه فورد 2007 وحاط شعار النصر على الشنطة !
قلت : خلاص يعني ، يوم إنك خذت اللي تبي صرت ترفع صوتك علينا . قال إيه بارفع صوتي ونصّ وبكره بكلبشك بعد ( شرط إنه مايعرف وش معناها بس يحسّها شي قوي ويخوّف ) . قلت يالله نشوفك وش بتسوي ، كانك رجال كلبشني ياملعون الصيرْ يامقطّع أربع . واقطع الخط في وجهه وعظامي ارتخن وعرّقت وطلع جلدي اصفر كني ضب جايع ، وبيني وبينكم خفت إنه يكلبشني صدز وادخل السجن .
عاد عيال عمتي يقولون إن حقين الإنتخابات يصيرون مثل منصب الملك وعندهم
صلاحية يسجنون ، وارقامهم مراقبه ، وعند بيوتهم عسكر يدورون في الليل يخافون عليهم
( تسذب قروي معه الكفاءة )
وتمرّ السنين ووراها سنين . وماشفنا بالرياض شي . طريق الملك فهد منخرع تستفه وزحمته من حي عتيّقه لين حي الرائد مابرحت مثل ماهي . أطلع من البيت الساعة ست ونص عشان أوصل الساعة ثمان . ملّيت وانا اسمع الرادو . نفس الاخبار هي كل يوم ماتغيّرت . استقبل ، ودّع ، والقذافي يقول معي الملايين !
نفس السيارات اللي كل يوم تمشي جنبي حتى إني لافقدت سيارة يضيق صدري ، أشك إنه ياميّت ياعنده وعكه صحية ومهوب مداوم !
شوارعنا مكسّره ومتخرّعه والزفلت كنه زبادي من يحطونه وهو يصير مارج ، خرّب مواترنا .
وعود تسمعها بس ماش ، حتسي فاضي . بنطوّر وبنزيّن وبنخليكم تنعمون بالراحة وماقد ذقنا طعم الراحة إلا في " دبي " ولا في " مسقط " .
صحيح بيحلّون مشاكل . بس مهوب مشاكل المجتمع اللي انتخبوهم . بيحلون مشاكلهم مع حريمهم مشاكل عيالهم مشاكلهم مع سواويقهم . ولا حنا . نطرد ورى الخيل وماندري وش اللي قدّامه .
تدرون عاد كمعلومة : المُرشح والمُنتخب ياخذ كل شهر 5000 ريال ، وياخذ عليها بنهاية الفترة 100 ألف ريال ، وسمعت من مصدر مضروب بس إنه يجيب العلم ، إنهم ياخذون مليون عقب أربع سنين . كل شي وارد والمُرشّح مايهرول عبث ..
حنا كبشر . بننتخب . ماعندنا مشكلة . بس نبي وعود صدقيه . وعود التسذب هذي ملينا منها .
نبي الدولة تشترط على كل شخص مُنتخب وفاز بالترشيح ، إنه يطبّق برنامجه الإنتخابي اللي وعد فيه في خلال أربع سنوات ولا يدفع نصف مليون ريال لخزينة الدولة ولا يوزّعونها على عيال البديعة ترى ماعندهم وظايف .
عقب أربع سنين ترى برشّح نفسي للإنتخابات الجاية . شرط إن أخلّي الرياض مثل سفرة مطعم النافورة . تلقّ وماينشب فيها وصخ ..
رشّحوني وحطّو أول حرفين من إسمي ومالكم إلا أني أخلّي طريق الملك فهد مثل ماقال خوينا " سيده " .
فاصلة : الإنتخابات الجايّه فيه " مكاييج " ترد الروح .. على الأقل : يخفّ الوجع علينا شوي !
تابعوني على التويتر
http://twitter.com/#!/faisal_suliman
تابعوني على الفيس بوك
http://ar-ar.facebook.com/mudmeen | http://www.facebook.com/alkatb.mdmnshahy
ولتصفّح مواضيعي ، إفغص على هالصورة
http://www.nawafnet.ws/msg-4821.htm
الإهداءات
المواضيع المتشابهه
إنتخبوني . وترى بفوز غصب عن اللي مايبوني !
العرض العادي
