الحريم عند الصراف فوق الزحمه زحمه !

الحريم عند الصراف فوق الزحمه زحمه !





<div dir='ltr'>

السلام عليكم ورحمه الله وبركاته
اسعد الله اوقاتكم بكل خير ،
احييكم وارحب بكم ي سيداتي وسادتي ،
ايهآ الحفل الكريم

25 من كل شهر
هذا التآريخ لا ينسآه اي سعودي يعيش على هذي الارض

السالفه الاولى
رمضان يوم 1432/9/20 هـ
وقت الرواتب
في اخر ايام رمضان وبعد مارجعت من الخرج وعينت من الله خير وعقب الفطور الزين عند ابو نسب في فيذاك رجعنآ يا طويلين العمر والسلامه ل الرياض وبعدين لو اني داري اليوم وانا رايحن الخرج وب صفق مشوار 100 كيلو نجيب معنا تمر وماء ونفطر لكن يوم وصلنا باقي حدود الساعه الا رربع على الاذان بذاك ،

عينت من الله خير وجمعت الفواتير فواتير الكهرب والتلفون وقلت اشوف صراف اسدد منه واسحب الي يقدرني الله عليه

نقزت اول صراف الا صف سيارات وراء بعض وبينهم دوريه حدود السبع سيارات السياره الاولى حرمه مع السواق ومسويتن زحمه فاتحتن باب الفان ونازله تسحب قلنا بتخلص الا يوم ظهرت الصراف الثاني والثالث اخر شي سحبت على هالصراف وقلت اروح البنك احسن
جيت البنك الا الصراف الاول عطلان والثاني سرا عليه والي براء البنك زحممه سيارات وانا انسآن احب اقابل الصراف على روقان عششان محدن يبثرني وانا اسدد لاني شغل تسديد عن طريق النت والهاتف المصرفي ما اعرف له وشغلتهم حوسه ب حوسه
رحت صرافن أخر جمب سوق فيه شايب شوي جت حرمتين شوي الا الحريم وراء بعض وواجد
يعني يقالي ب صير ذرب وافتح لهن مجال وليتن مافتحت المجال صفن وراء بعض وفيك خير تكلم اذا ما لمت عليك الخلق ولا بعد جمب السوق به جمس هيئه

انتظر الحرمه الاولى الي طلعت صراف وسحبي ثلاث الاف وطلعي الصراف الثاني وسحبي خمس الاف وطلعي الصراف الثاني وسحبي خمس الاف اعنبو حيتس 13 الف وش بتزييني فيها بالسوق وليته سوقن يسوى على زحمته ابو رياليين ومسوي تخفيضات 20 %

المهم تنحنحت وطلعت فواتيري وسددتهم ويوم جيت ب اسحب الا لايمكن السحب بالوقت الحالي
لييييه طيب ؟
الصرافات زحمه وب يالله لقيت صراف واخرتها لايمكن السحب نبي نروح نسسدد الخياط ونعطيه دراهمه وناخذ الثياب

السالفه الثانيه
الاربعاء ليله الخميس 1433/1/6 هـ
الساعه 12 ليلاُ
المهم بعد هذي الحوسه تعلمت وصرت كشخه واسدد فواتيري عن طريق مباشر عن طريق الهاتف المصرفي
او عن طريق النت المهم من ثلاث ايام وانا احاول اسدد عن طريق الهاتف والنت ماش مو ضابطه معاي نهائيا
المهم البارح الساعه 12 تحمست وقلت خلني انقز اقرب صراف ارحم من الهاتف المصرفي والغثاء الي مثل كذا
مريت 4 صرافات سامبا وكلها عطلانه جيت الفرع حقهم الي بشارع الحسن بن علي فيه ثلاث صرافات وحده ايداع والباقيات جربت بصرافتين ماضبط معاي وقردني الله ودخلت صرافتي بمكينه الايداع المهم سويت سداد وكذا
وتمت العمليه وتعلق المكينه !!
واصفق فيها وانتظر الايصال يطلع لي ان العمليه تمت وخصموا الفاتوره من حسابي الا ماش ياولد معنده الصرافه
شكلها كانت بردانه شوي الا اناظر الا اللمبه مولعه اخضر يعني دخل صرافك
اثاري الصرافه ملعونه المترس كلت بطاقتي
وقتها جيبي مافيه الا سبع ريال وكنت مخطط اسحب دراهم وثم انقز يم البقاله
المهم ارتفع ضغطي وطنقرت رجعت البيت ومسكت على التلفون وكلمت البنك وعلمتهم ان الصرافه انبلعت
ونشبت على الهاتف المصرفي ليييييين سددت فواتيري

السالفه الثالثه
قصتي مع الصرافات وبلعهن لبطاقتي ياكثرها تخيلوا خلال شهر راجعت البنك ثلاث مرات عشان اطلع صراف جديد
الموظف يقولي انت وش قصتك مع الصرافات قلت لاقصه ولا شي وانت دافعن من جيبك شي كلها على حسابي ياعيال اللذينا
مره يوم اربعاء والرواتب نازله ووقتها طفران مافي جيبي ريال وفوق ذا كله السياره مولعه لمبه البنزين لان نظامي انا نظام شياب
ما اعبي بنزين الا لما اشوف اللمبه مولعه عشان يفلل التانكي ويطلع الهواء من التانكي
المهم وقفت في محطه وبها صراف وزين اني ماوقفت وقلت سديق عبي بنزين الين اسحب
المهم وقفت عند الصراف وانزل القزاز وعقب ما شيكت على الحساب وشفت البنك خذو قسطهم ياجعلهم مايتهنو فيه
كزيت وبصرف لي 200 الا الصراف قامت تشرط مافيه الا 500 ناظرت قلت يلا العوض ولا القطيعه ووراء ثلاث مواتر
ضغطنا على الـ 500 وعشان انها طالعتن من غير نفس علقت الصراف وانا الي انشب عنده والي وراي يدقون بوراي
قلت يابوي صبر انت وياه نشبت صرافتي يوم شافوا اني ناشب ومافي امل اتحرك حركوا من عندي مرتفعن ضغطهم
بيني وبينكم تكيت نص ساعه قلت يمكن الله يهديها وتكز الـ 500 المشكله ماعلقت الا يوم جت تسحب واخاف اسري من عندها
وتطلع وتصرف الدراهم لواحدن ثاني يوم شفت انها علقت وطلع على الشاشه الجهاز عطلان قلت كويس خلني اروح واتسلف من اميمتي لين يوم السبت واطلع صراف اخر
وهذي سالفه ثانيه وتروها اخر سالفه ادري ياكثر سوالفي < لاحدن يعطيني جوال والا كيبورد
في نص الشهر وتكون طفران وتطلب لك واحدن دراهم ومير ربي يهديه ويكون وقتها ماخذن له قرض وماسكتن معاه طيب يسددك
المهم دق علي وقال سلطان كز لي رقم حسابك
واكزه له واحتري رساله من البنك يقولو تم ايداع مبلغ كذا كذا
يوم جت الرساله وادخل على اهلي قلت وش مصلحين عشاء قالوا والله لسه نفكر ماندري وش نصلح !
قلت لهم وش رايكم بس اعشيكم برى وعلى حسابي ما مداني اكمل كلامي الا كلهم لابسين وجاهزين
طلعنا من البيت وشطفت صراف وابي اسحب الا يطلع لي خطأ في بيآنات الحساب الرجاء الاتصال في البنك ؟؟
شكله يوم ارسل الدراهم مرسلها من غير نفس يالتعبان
اتصلت عليهم قالوا لازم تحديث بيانات ولازم تراجع البنك !!
طيب وش الحل بطاقات احوالي وقتها يبي لها اسبوع عشان تطلع من الاحوال موديها لهم يجددونها
والحين مهايطن على اهلي وقلت بعشيكم يوم شافت اميمتي الوضع هاللون
قالت انا ووليدي واحد خلاص انا بعشيكم على حسابي
انقذت الموقف حصصه عسى الله لايحرمني منها

وهذي معانآتنا كل شهر مع لصرافآت ومع الحريم وزحمتهن

واكيد الجميع لهم مواقف كثيره عند الصرافات اتحفونا فيها

السؤال الي يبطح نفسه ؟
1- هل صادف قدامك حرمه ابثرتك عند صراف ؟
2- وش شعورك وانت صاف ويوم يجي دورك تعذر السحب ؟
3- احد منكم قد صار معاه مثل المواقف الي صارت معي ؟
4-اذا اعجبكم الموضوع قيموني واذا ماعجبكم البير على الذمه

أخو صيته

تابعوني على المواقع التاليهه

<font color="#ff0000" size="5" face="Arial">